Qeverisja vendore nga ana tjetër i ka lënë në ‘mëshirë të fatit’ konsumatorët, pavarësisht detyrimit ligjor. Pjesa dërrmuese e bashkive, nuk ka zyra të posaçme për mbrojtjen e konsumatorit, duke mos ushtruar sipas parashikimeve ligjore një sërë funksionesh, që ndikojnë në mënyrë të drejtë për drejtë te qytetarët, si nga shëndeti ashtu edhe financat e tyre. Ligji aktual dhe Strategjia Ndërsektoriale për Mbrojtjen e Konsumatorëve e Mbikëqyrjen e Tregut 2014-2020, parashikojnë ngritjen në çdo bashki të një njësie, e cila duhet të mbulojë ankesat dhe çështjet, që shqetësojnë konsumatorët. Por, teksa jemi në muajt e fundit të 2020 dhe të “finalizimit” të kësaj strategjie, pjesa më e madhe e bashkive nuk ka një zyrë të dedikuar për qytetarët, që përballen me praktika të padrejta dhe abuzive nga ana e bizneseve dhe tregtarëve.