Hapja ose jo e teatrove në të gjithë vendin është një nga çështjet që ka ngjallur interes jo vetëm nga drejtuesit e tyre por edhe nga publiku. Gjatë gjithë këtyre muajve të pandemisë këto institucione të artit kanë qenë të mbyllura duke stopuar kështu edhe punën e shumicës së artistëve. Ne kontaktuam me disa nga drejtuesit e institucioneve të rëndësishme teatrale në vend për të marrë opinion e tyre në "Wake Up" lidhur me mundësisë ose jo të hapjes së teatrove. Kiço Londo si drejtor i Teatrit Kombëtar Eksperimental "Kujtim Spahivogli" nuk pranoi të jetë në program pasi u shpreh se nuk i takon atij të japë mendim për këtë çështje dhe se do të flasë për kushtet vetëm kur të japë kryeministri urdhrin për të hapur këto institucione. Elio Bajramaj si drejtor i Teatrit "Aleksandër Moisiu" të Durrësit, na tha në telefon se vetëm specialistët mund të flasin për këtë temë dhe jo drejtuesit. Sipas tij mbetet e paqartë nëse do të lejohen kondicionerët edhe nëse hapet teatri me 30 % të kapaciteteve. Të dy këta përfaqësues në thelb nuk janë kundër ndonëse nuk mund ta thonë këtë publikisht pa pasur një vendim qeverie. Ndërkohë Zamira Kita nga Teatri "Andon Zako Çajupi" në Korçë dhe Rita Gjeka nga Teatri "Migjeni" në Shkodër në një lidhje me Ëake Up deklaruan se të gjithë drejtuesit e teatrove si në Tiranë dhe në rrethe dhe vetë artistët janë bashkë në mendimin se teatrot duhet të hapën. "Kam marrë dakordësinë nga të gjithë drejtuesit e e teatrove në vend. Jemi organizuar dhe do t'i kërkojmë një takim Ministres së Kulturës për të kërkuar hapjen e teatrove. Jemi të bindur që Ministrja do të na presë dhe do të ndjekim të gjitha hallkat deri në hapjen e skenës së teatrit"- tha aktorja dhe drejtuesja e Teatrit "Andon Zako Çajupi, Zamira Kita.