Filmi "Zana" i regjisores kosovare, Antoneta Kastrati, gjatë këtyre ditëvë (10-20 qershor) konkurron në festivalin ndërkombëtar "Sidney Film Festival". Antoneta është një ndër 10 regjisoret femra nga Evropa që janë pjesë e këtij festivali. Deri më tani ky film është prezantuar në disa vende si në Chicago, në Toronto Film Festival e po ashtu ishte kandidaturë e Kosovës për "Oscar" vitin e kaluar. Filmi bën fjalë për një dramë mahnitëse, për traumën e pasluftës dhe për procesin e shërimit të saj, e treguar në një mënyrë të bukur, të thjeshtë, dhe tërheqëse nën interpretimin e aktores Adriana Matoshi. Ajo luan rolin e një gruaje kosovare, e cila vuan ende efektet shkatërruese të luftës dhe përpiqet të gjejë paqe aty ku mbizotëron vetëm tmerri. Ky film është frymëzuar nga kujtime dhe përvoja personale e regjisores Kastrati lidhur me traumën e luftës, që i ka kushtuar të ëmën e saj dhe një motër. Antoneta Kastrati nga Los Angeles na tregoi se filmi "Zana" flet për historinë e Lumes, e cila humbi vajzën e vetme gjatë luftës dhe ende përballet me ankthe gjatë natës, me presionin nga rrethanat e saj për të bërë një fëmijë tjetër, dhe me veten për të kapërcyer dhimbjen shpirtërore dhe për të vazhduar jetën e saj në paqe...