Amerika votoi sot por zor se sot mbrëmje do të dihet kush e fitoi garën e ethshme presidenciale. Për të kuptuar nëse Donald Trump do të mbetet në krye të Shtëpisë së Bardhë, apo Joe Biden do t’ia zërë vendin si presidenti i 46 i Shteteve të Bashkuara, me shumë gjasë do të pritet disa ditë, ndoshta edhe javë. Kjo sepse numërimi i votave nuk kryhet natën e votimeve, sikur ka ndodhur zakonisht prej shumë palë zgjedhjesh. Arsyeja kryesore është se votat me postë (ose të dorëzuara me zarf), nuk do të mund të numërohen kaq shpejt, meqë janë shumë. Të paktën 100 milionë amerikanë votuan më herët, kudo që një gjë e tillë është e lejuar para datës kryesore të votimit. Votimi me postë është mbështetur dhe ndjekur më shumë nga demokratët. Ndërsa republikanët kanë preferuar të votojnë fizikisht. Gazetari, Ilir Ikonomi, nga Zëri i Amerikës foli për rezultatet e orëve të fundit të zgjedhjeve në Amerikë. Ai zbuloi se ishte një nga qytetarët amerikanë që ka votuar me postë. Shtetet e Bashkuara kanë votuar për të zgjedhur të ashtuquajturit “Zgjedhësit e Mëdhenj”, të cilët nga ana tjetër do të zgjedhin presidentin e 46 në historinë e tyre. Sfida është midis Donald Trump, i cili kandidon për Partinë Republikane dhe Joe Biden, ish-zëvendëspresident i kabinetit qeveritar të Barack Obamës dhe kandidat i demokratëve. Pritej një pjesëmarrje rekord: mbi 150 milionë nga 240 milionë votues me të drejtë vote.