Shpërndarja e videove me të mitur ku kryhen veprime nga më të ndryshmet nga ato bullizuese e deri tek ngacmimet seksuale, në rrjetet sociale apo edhe në median online për fat të keq janë bërë mese të zakonshme. Rasti më i fundit që po qarkullon në faqe dhe portale të ndryshme online është ai i 12-vjeçares e cila është filmuar nga bashkëmoshatarë të saj duke u ngacmuar dhe abuzuar seksualisht. Videoja ka bërë xhiron e rrjetit duke nxitur reagimin e shumë njerëzve të cilët jo vetëm kanë dënuar këtë akt të adoleshentëve, por edhe për mënyrën se si vazhdon edhe më tej skandali duke u pasqyruar lirshëm në rrjetet sociale si një lajm bombastik. Por a hetohet për këto video që shpërndahen në rrjetet sociale, a merren masa që raste të tilla mos të përsëriten, a duhet të ketë një etikë për atë që publikohet dhe cilat pasojat që lenë tek fëmijët që i përjetojnë apo dhe që i shohin video të tilla. Altin Hazizaj, Drejtor i përgjithshëm i Qendrës për Mbrojtjen e të Drejtave të Fëmijëve në Shqipëri tha se ligji i dënon jo vetëm ata që e kanë kryer veprimin por dhe ato që e publikojnë dhe e shpërndajnë. "Kjo është hera e dytë që publikohet kjo video. Është publikuar fillimisht para 6 muajve dhe ri publikohet një ditë më parë sërish. Kjo është edhe më e rëndë"- tha Hazizaj, ç'ka do të thotë se në publikimin e parë ligji me sa duket nuk ka vepruar ndaj mediave që e publikuan të cilat morën guximin ta ri publikojnë videon duke qenë të sigurt që nuk do të ndëshkohen.