Gjesti i violinistit shqiptar Aleksandër Qyteza i cili mori violinën e tij dhe doli nga shtëpia për tu sjellë pak tinguj gëzimi banorëve të Pontevicos në provincën e Brescias që kishin ditë të izoluar u bë lajm i ditës në Itali. Aleksandri zgjodhi të interpretonte poshtë shtëpisë së një vogëlusheje e cila kishte varur në ballkonin e shtëpisë pankartën “Andra tutto bene”. Banorët e Pontevico në Provincën e Brescias e kanë shijuar këtë “surprizë”, duke e parë dhe dëgjuar nga ballkonet apo dritaret e shtëpisë. Ky ka qenë rasti ku një violinë e vetme ka qenë në gjendje të emocionojë dhe të sjellë gëzim dhe shpresë mes njerëzve. Violinisti dhe dirigjenti i njohur shkodran Aleksandër Qyteza është larguar nga Shqipëria në vitin e mbrapshtë, siç ai e quan… atë të 1997 dhe tashmë prej 23 vitesh jeton në Provincën e Brescias, në Pontevico. Aleksandër Qyteza ka lindur në vitin 1958. Ai u diplomua në violinë dhe më tej drejtoi Konservatorin e Shkodrës dhe Operës së Tiranës. Ai është i njohur në Itali që nga vitet 1990, si violinist dhe dirigjent. Ai tashmë është drejtor kori dhe mësues.