Pas Kosovës, edhe Shqipëria do të bojkotojë ceremoninë e ndarjes së çmimeve Nobel në Suedi, kundër fituesit për letërsinë, austriakut Peter Handke, që njihet si adhurues i Sllobodan Millosheviçit. Ndërkohë dje, edhe ambasadori i Turqisë në Suedi, Hakki Emre Yunt, tha se do ta bojkotonte ceremoninë, në përkrahje të Shqipërisë dhe Kosovës. Sipas ministrit të jashtëm në detyrë, Gent Cakaj, justifikimi i mizorive të luftës gjatë shpërbërjes së Jugosllavisë nuk duhet të shpërblehet. “Çdo shpërblim i personaliteteve që kanë mohuar gjenocidin edhe nëpërmjet veprave të tyre letrare, vetëm forcon prirjet për t’iu shmangur përgjegjësive historike dhe relativizuar peshën e rëndë të krimeve të luftës, pastrimit etnik dhe gjenocidit”, tha dje Cakaj. Edhe ministri i Jashtëm i Kosovës, Behgjet Pacolli bëri të ditur se kishte udhëzuar ambasadoren Shkëndije-Geci-Sherifi që të bojkotojë ceremoninë e dhënies së çmimit Nobel. Por a mjafton kaq? Çmimi Nobel në Letërsi për Peter Handken, i njohur si adhurues i Millosheviçit, u shoqërua me reagime të shumta nga gjithë shqiptarët dhe më gjerë në Ballkan, plagët e të cilëve mbeten ende të hapura nga luftërat në ish-Jugosllavi, në vitet 1990. Kritiku letrar Agim Baçi u shpreh se në përgjithësi ndodh që kur një shkrimtar fiton çmimin Nobel ka një kuriozitet të shtuar për ta lexuar. Në rastin e Peter Handke nuk ka ndodhur kështu. Shqiptarët duket se refuzojnë ta lexojnë atë. Dhe kjo është një formë reagimi.