Wake Up/ Adelina Thaqi e revoltuar: Tregoni nëse jeni me COVID, ndryshe bëni krim me paramendim

Muajt e fundit, teksa COVID-19 po gjen përhapje në të gjithë botën, kemi parë se si virusi i ri nuk ka kursyer askënd, nga të gjitha moshat por edhe njerëz nga të gjitha profesionet. Nuk kanë qenë të paktë edhe njerëzit e artit që janë prekur nga koronavirusi. Një javë më parë dy këngëtare kosovare, Adelina Thaqi dhe Eliza Hoxha kanë deklaruar se kanë rezultuar pozitive ndaj COVID- 19. Ashtu si të gjithë njerëzit që po i përjetojnë në forma të ndryshme simptomat e këtij virusi, edhe ato po përballen këto ditë me pasojat e tij, të cilat nuk janë vetëm shëndetësore. Adelina Thaqi na rrëfeu sot jo vetëm eksperiencën e saj në përballjen me COVID-19, por përcolli dhe një mesazh të rëndësishëm që ajo ka dashur të përcjellë që në momentin që rezultoi pozitive. Ajo shprehej e revoltuar se ka shumë njerëz të papërgjegjshëm që jo vetëm nuk respektojnë masat, por edhe e fshehin që janë të prekur duke rrezikuar jetën e personave të tjerë. "Nëse një njeri e fsheh se është pozitiv me COVID dhe e shpërndan këtë sëmundje unë mendoj se është krim me paramendim"- tha e revoltuar këngëtarja. Shpesh herë po flitet për stigmatizimin e personave që janë të infektuar me COVID-19 dhe ndoshta kjo bën që shumë prej tyre ta mbajnë të fshehtë faktin që janë prekur nga ky virus, por kjo sjell pasoja për të tjerët të cilët janë të ekspozuar ndaj infektimit. Këngëtarja Adelina Thaqi, është një prej artistëve që mendon se është infektuar me COVID-19 pikërisht nga një situatë e tillë. "Kur kam rezultuar pozitiv kam dalë te dera e shtëpisë sime dhe kam treguar se kam rezultuar pozitive, edhe fëmijëve që afroheshin për të luajtur me fëmijët e mi u kam thënë të largohen sepse kam rezultuar pozitive me COVID-19. Kam lajmëruar me telefon të gjithë komshinjtë, të njohur dhe të afërm për t'u treguar."- tha këngëtarja.