Qarkullojnë shumë teori mbi atë sesi virusi Covid-19 po sillet me popullata të vendeve ndryshme. Një nga teoritë që në fakt po diskutohet është fakti se ne si popull kemi pasur një sistem shumë strikt të vaksinimit të popullatës. I pyetur nëse fakti që ne jemi një popull përgjithësisht i vaksinuar dhe në një farë mënyre mendohet se do të përballemi me pasoja më të lehta me këtë virus hileqar dhe të panjohur, epidemiologu, Dritan Ulqinaku shprehet se nuk e beson këtë teori. "Me fjalë të thjeshta nuk kam besuar asnjë teori që ne si popull jemi të veçantë. Ne jemi si të gjithë evropianët, jemi po aq të prekshëm sa të gjithë dhe po aq të rrezikuar ndaj këtij virusi. Të gjitha këto janë spekulime. Unë besoj se ne duhet të vazhdojmë të jemi strikt përsa i përket masave të kujdesemi për veten".