Shqipëria nga java në javë po shënon raste në rritje të infektimeve të reja, fatkeqësisht të shoqëruara këto dhe me një numër të konsiderueshëm të humbjeve të jetës. Sipas të dhënave zyrtare e gjithë Shqipëria është e përfshirë nga raste me Covid19, por Tirana, Fieri, Durrësi, Korça mbeten vatrat më të nxehta me një numër të lartë të rasteve aktive. E teksa situata mbetet kritike për një vend të vogël si Shqipëria, Komiteti Teknik i Ekspertëve nga java në javë po del me masa edhe më shtrënguese. Ditën e djeshme është vendosur që mësimi në sistemin parauniversitar që prej datës 1 dhjetor të zhvillohet i alternuar, në shkolla dhe online. Ndërkohë që kujtojmë se vazhdon ora policore që prej fashës 22.00 të mbrëmjes deri në 06.00 të mëngjesit, vendosja e maskës sapo del nga shtëpia si dhe evitimi i të gjitha ambienteve ku ka më shumë se 10 persona. Por a janë të vetmet masa që duhet të merren që të shkojmë drejt një ulje të numrit të rasteve, a duhet të mbyllen shkollat fizikisht dhe të jenë vetëm online ashtu si universitet, a janë ato burim i shpërndarjes në vatrat familjare të SarsCov2? Eugena Tomini, Shefe e Survejancës dhe Shërbimit të Inteligjencës Epidemike në ISHP, në një intervistë për Wake Up, foli për situatën dhe se çfarë pritet të ndodhë në javët në vazhdim. "Më 1 shtator kur u hapë shkollat ne bëmë një depistim masiv të mësuesve dhe nxënësve. Dhe u vu re që nuk kishin një përqindje të lartë të prezencës së pozitivitetit te kjo moshë. Edhe me kalimin e javëve, pozitiviteti nuk ka ndikuar nga mosha pediatrike. Mosha pediatrike nga 5-15 vjeç ka një përqindje transemtimi që varion nga 1.7-1.8% që nuk ndikon në pozitivitetin e lartë të popullsisë. Për rrjedhojë ka transmetim të virusit nga fëmijët por kjo është në një përqindje shumë të vogël krahasuar me përqindjen e transmetimit nga i rrituri te i rrituri."