Vetëm në Tiranë, sipas disa vlerësimeve të fundit, ka disa qindra pacientë me Covid-19 të cilët kanë marrë aparate oksigjeni në shtëpi (diçka shumë e rrezikshme gjithsesi sipas mjekëve). Kuptohet që aparatet kanë nevojë të vazhdueshme për energji elektrike, sepse edhe sikur 1 minutë të mos pompojnë oksigjen në mushkëritë e pacientëve, ata vdesin. Por nuk është vetëm rasti i këtyre lloj pacientëve të cilët nuk mund t’i kontrollosh. Janë edhe spitalet apo institucionet e tjera të rëndësisë së veçantë të cilat në këtë kohë pandemie duhet të kenë energji të pandërprerë elektrike; dhe madje me tension të paluhatshëm. Si arrihet kjo? Si mundet që energjia të mos mungojë për asnjë moment, pavarësisht se Operatori i Shpërndarjes është i detyruar të bëjë edhe stakime për shkak të investimeve dhe remonteve të rrjetit? Klevis Jahaj, Drejtor i OSSH, Rajoni Tiranë foli në Wake Up për plan strategjinë e Operatorit të Shpërndarjes në kohë pandemie.