Në bisedat e përditshme shpesh dëgjon shprehjen: është fëmijë i shkathët, por nuk përqëndrohet. Është e pamundur që një mësues gjatë përvojës së vet profesionale të mos ketë hasur nxënës të cilët nuk qëndrojnë dot ulur gjatë një ore mësimi ose nxënës që vazhdimisht janë të zhytur në aktivitete që nuk kanë të bëjnë aspak me atë që po ndodh në klasë. Këto janë raste që gjithnjë e më shumë po bëhen të shpeshta jo vetëm në shoqërinë shqiptare por edhe në botë. Mungesën e vëmendjes, sjelljet impulsive dhe ato të hiperaktivitetit, studiuesit i kanë përkufizuar si një çrregullim neurologjik i cili sot njihet në termin (A.D.H.D), Attention Deficit Hyperactivity Disorder ose çrregullimi i vëmendjes me hiperaktivitet. Ky çrregullim nuk përjashton asnjë moshë, por më i shpeshtë është tek fëmijët. Studimet e viteve të fundit nga Qendra për Kontrollin dhe Parandalimin e Sëmundjeve thonë se 6.1 milion fëmijë në Shtetet e Bashkuara ose (9.4 përqind) midis moshave 2 deri 17 vlerësohet vuajnë nga ky çrregullim. Më shumë se dy të tretat e fëmijëve me ADHD vazhdojnë të shfaqin problematika të shumta në moshën e adoleshencës dhe të rritur. Adoleshentët me ADHD rrezikojnë më shumë sesa të tjerët të braktisin shkollën, të abuzojnë me drogën dhe alkoolin, të shfaqin sjellje kriminale. Por si të sillen prindërit, mësuesit, të afërmit nëse ndodhen përballë fëmijëve apo edhe më të rriturve që vuajnë nga ky çrregullim? Për herë të parë në dorën e profesionistëve vjen një udhëzues, në formën e një libri, i përgatitur nga psikologia Lorela Garuli të cilën e kemi ftuar sot për të na dhënë më shumë detaje rreth këtij çrregullimi, dhe modeleve që duhet të ndjekim për të dhënë në kohë trajtimin e duhur.