Në "Qytetin Studenti" afërsisht banojnë rreth 5400 të rinj nga rrethe të ndryshme të vendit. Por duket se pavarësisht investimeve që janë bërë aty në vite të ndryshme, ka mjaft probleme të cilat vazhdojnë ti vuajnë të rinjtë duke ju ndikuar në cilësinë e arsimimit të tyre, por edhe në financat e familjeve të tyre. Problematika është konstatuar nëpërmjet një anketimi që është bërë gjatë muajit shkurt në "Qyteti Studenti" ku janë pyetur rreth 4% e studentëve që banojnë në 26 godinat e këtij qyteti. Probleme janë konstatuar që nga hapësira akomoduese në dhomë e cila është e pamjaftueshme, kushtet higjeno-sanitare, ngrohja e cila sigurohet nga vetë studentët, por edhe mungesa e mensave publike, ndërkohë që ato private ekzistente në këtë qytet ofrojnë çmime shumë të kripura për këta të rinj. Anketimi është kryer nga " Qëndresa Qytetare" dhe Usaid. Për më tepër kemi të ftuar në studio, Migen Qiraxhi nga "Qëndresa Qytetare" dhe do të kemi dhe një lidhje direkte nga qyteti studenti, të rinj që banojnë aty për të na i faktuar të dhënat e anketimit. Sot diskutuam për rezultatet e këtij anketimi por vetë studentët në një lidhje direkte nga "Qyteti Studenti" u shprehën se janë të frikësuar nga situata e koronavirusit në vend. "Ndjehemi të pambrojtur. Në "Qytetin Studenti" nuk janë kushte elementare higjieno-sanitare. Prindërit na thonë të kthehemi në shtëpi nga frika e virusit. Shoqja ime e dhomës prej disa ditësh është larguar për në shtëpi"- tha njëra nga studentët në lidhje direkte.