Teksa një pjesë e mirë e shteteve në botë po shtrëngojnë masat AntiCovid dhe po i rikthehen izolimit për të frenuar përhapjen e virusit, 6000 shkencëtarë dhe ekspertë mjekësorë në të gjithë botën dhe 50,000 njerëz janë përfshirë në një lëvizje globale kundër masave kufizuese. Lëvizja ka nisur fillimisht në Shtetet e Bashkuara, dhe është përhapur në një pjesë të mirë të vendeve të tjera të botës. Asaj i janë bashkuar emra të rëndësishëm të shëndetësisë botërore, si Dr Sunetra Gupta, epidemiologe në Universitetin e Oksfordit, Prof. Ellen Townsend, ekspert në Universitetin e Nottingham apo dhe Paul McKeigue, në Universitetin e Edinburgut , si dhe mbi 60 mjekë të kujdesit parësor, midis tyre dhe emra të njohur ekspertësh, në Britaninë e Madhe të cilët thonë se zbatimi i politikave të bllokimit derisa të ketë në dispozicion një vaksinë, do të shkaktonte "dëme të pariparueshme”. Kjo lëvizje njihet si "Deklarata e Madhe e Barrington" e cila mbështetet paralelisht nga rekomandimet që kanë dalë nga studimi më i fundit nga Universiteti i Edinburg, i cili tregoi se bllokimet e rrepta, veçanërisht ato që frenojnë aktivitetet e të rinjve, nuk kanë gjasa të shkurtojnë numrin e vdekjeve në planin afatgjatë dhe madje mund t’i rrisin ato. Studimi shqyrtoi skenarë të ndryshëm të bllokimeve dhe zbuloi se ato mund të zgjasin pandeminë dhe të ndalojnë imunitetin e popullatës. Shkencëtarët arritën në përfundimin se Covid-19 kërkonte një strategji të ndryshme nga gripi dhe fokusi duhet të jetë te mbrojtja e të moshuarve dhe personave vunerabël ndërsa njerëzit e shëndetshëm të vazhdojnë jetën e tyre normale. Të rikthehen në ambientet e punës, shkolla, universitete, palestra. Të frekuentojnë baret, restorantet dhe aktivitet kulturore.