Shumëkush prej prindërve që na dëgjon tani, e ka në traditën e vet familjare që çdo 1 qershor t’i bëjë dhuratë fëmijës. Dhe dhurata kryesore sigurisht janë lodrat. Por sa të sigurta janë ato në Shqipëri? Qendra Konsumatori Shqiptar dhe Fondacioni Shoqëria e Hapur për Shqipërinë sapo kanë përfunduar një studim mbi situatën e lodrave në vend, përshtatshmërinë dhe rrezikshmërinë prej tyre. Studim që ua prezantuam sot për herë të parë në Wake Up. Lodrat janë produktet e raportuara me nivelin më të lartë të rrezikshmërisë, rreth 33%, pra 1/3 e totalit të njoftimeve për produkte të rrezikshme që hiqen nga tregu i përkasin kategorisë së lodrave. Ato mbartin rreziqe të ndryshme: kimike, fizike, elektrike/djegie etj. Alertet e njoftuara, si dhe rezultatet laboratorike tregojnë se risku kryesor për produktet lodra vazhdon të jetë ai kimik. Në alertet e njoftuara gjatë vitit 2018 për lodrat e hequra nga tregu, ky rrezik është prezent në rreth 45 % të rasteve.