Numri dy i PS Taulant Balla dha përgjigje aspak optimiste kur u pyet sa e mundur është zbatimi identifikimit elektronik të zgjedhësve dhe numërimit elektronik në disa zona pilot, në zgjedhjet e 25 Prillit. “Është shumë e qartë që disponibliteti ynë ka qenë për të testuar teknologjinë në një zonë e cila të ketë mundësi të mos dështojë, të mos pengojë në rezultatin e zgjedhjeve. Nuk gjej arsye pse PD nuk do që të testohet në Tiranë”. Edhe për mosrealizimin e votimit nga emigrantët, Taulant Balla problemin e shikon tek opozita. “Është e pa pranueshme dhe nuk kam arritur kurrë ta kuptoj pse PD dhe LSI nuk e duan votën e shqiptarëve që jetojnë jashtë territorit. Nuk e di nuk e kuptoj arsyen. Shpresoj ende që parashikimi që është bërë në kod të zbatohet plotësisht nga KQZ”. Në një kohë kur Taulant Balla për votën e emigrantëve e la topin në fushën e KQZ, shqiptarëve që jetojnë jashtë u mbeten edhe 12 ditë kohë, të regjistrojnë dëshirën e bërjes pjesë në vendimmarrjen e 25 Prillit përmes portalit e-albania.