Vathë për kujtim nga Gjirokastra/ Suveniret e veçanta me figura të njohura shqiptare dhe të huaja

Në pazarin e Gjirokastrës idetë atraktive janë të pafundme. Së fundi, Fereniqi, një prej artizaneve të pazarit bëri një gjetje unike që fillimisht edhe vetë ajo ishte pak skeptike si do të pritej. Ajo solli portrete të grave të njohura , të grave të famshme lokale në vathët që ajo shet në pazarin historik. “Më pëlqen shumë ky model vathësh sepse në radhë të parë është një risi, një model jo i parë gjithandej dhe ti ke mundësi ta personalizosh sipas dëshirës. Me anë të kësaj bizhuterie shumë të vogël dhe elegante ke mundësi të promovosh figura të ndryshme historike, figura vajzash dhe grash shumë të fuqishme por kjo bizhu të jep mundësi që veprat e tua të preferuara të artit t’i mbash gjithmonë me vete. Vathët e para të tilla i kam marrë me figurën e Frida Kahlo-s dhe të gjithë m’i kanë pëlqyer. Në çdo ambient që shkoja më kanë thënë sa të bukura vathët, pastaj u shpjegoj historinë. Gjithmonë i përditësoj me figura të ndryshme, me personazhe historik, me pikturat e mia të preferuara dhe shkojnë me çdo veshje, si paradite, si pasdite, duken edhe sportive edhe shik sipas veshjes”, shprehet Ina Margariti, kliente.