Vaksinimi i mësuesve është stacionuar këtë të premte në gjimnazin Halim Xhelo në Vlorë , ndërsa janë përfshirë në proces vaksinimi mësues nga disa shkolla të qytetit. Ndryshe nga ditët e tjera sot është vënë re një numër më i lartë i të interesuarve ,çka duket se lidhet me raportin e publikuar nga EMA , Agjencia Evropiane e Barnave,e cila ka arritur në përfundimin se vaksina Oxford-AstraZeneca kundër Covid-19 është "e sigurt dhe efektive". Para nisjes së procesit, specialistë të shëndetësisë kanë shpjeguar me detaje kujdesin para dhe pas vaksinës. Aktualisht janë vaksinuar rreth 100 mësues ,një numër relativisht i ulët nisur nga pasiguria ndaj kësaj vaksine, por sipas kryeepidemiologut Agron Bashllari interesimi i sotëm tregon se procesi do të shkojë mirë. Sipas tij vaksinimi do të vijojë edhe në ditët në vazhdim ,ndërsa në pallatin e sportit po vaksinohen bluzat e bardha që marrin dozën e 2-të .