Fiks Fare zbarkon në fshatrat e Finiqit, ku shirat e ditëve të fundit nuk morën vetëm çatitë… por gjithçka. Shtëpi të rrënuara, banorë të shpërngulur, të sëmurë që jetojnë në kushte çnjerëzore, të moshuar të braktisur dhe familje që nuk kanë më ku të kthehen. Në Brajlat, Manthjo dhe bashkëshortja e tij e sëmurë me kancer u detyruan të largohen natën, pasi shtëpia e tyre u çarë e u fundos nën tokë. Në të njëjtin fshat, Niko dhe bashkëshortja e tij, të goditur nga sëmundjet dhe varfëria, sot jetojnë në një dhomë të huaj, pasi shtëpia u shpall e pabanueshme. Ndërsa në Dhivër, Grigori i braktisur dhe i sëmurë mendor jeton mes lagështisë, rrënojave dhe një çatie që pikon mbi shpresën e tij të fundit. Janë tragjedi të padukshme, një katastrofë që po ndodh para syve tanë… ndërsa institucionet mungojnë.