SHBA ka ndërprerë zyrtarisht bisedimet me Kosovën duke shënuar një prej faqeve më të errëta të historisë së shtetit më të ri të Europës. Si kurrë më parë, marrëdhëniet mes dy shteteve janë të tensionuara dhe ka zero komunikim. Departamenti Amerikan i Shtetit vendosi ndërprerjen e bisedimeve me qeverinë Kurti me anë të një njoftimi nga ana e ambasadës amerikane në Prishtinë. I menjëhershëm reagimi i qeverisë Kurti që nëpërmjet zëdhënësit të qeverisë, Përparim Kryeziu, kundërshtoi në mënyrë të moderuar akuzat e SHBA-ve. Ai thekson se asnjëherë nuk ka sunduar ligji, qetësia dhe siguria në Kosovë si gjatë periudhës së qeverisë Kurti. Reagim i fortë dhe nga presidentja Vjosa Osmani që indirekt ia faturon dështimin Albin Kurtit, pasi në deklaratën e shpërndarë për media shprehet se Presidentja e Republikës së Kosovës do të vazhdojë të punojë ngushtë me Shtetet e Bashkuara në të gjitha fushat e interesit të përbashkët. Opozita ka qenë e gjitha në një linjë dhe në deklaratat e tyre kanë shigjetuar direkt qeverinë dhe kryeministrin Kurti, i cili sipas tyre është në largim. A po futet Kosova në një trajektore shumë të rrezikshme me pezullimin e bisedimeve me SHBA?