Emisioni investigativ Top Story për herë të parë zbërthen trafikun e klandestinëve arabë, të cilët përdorin Shqipërinë si trampolinë për të udhëtuar drejt vendeve të Bashkimit Europian. E gjithë procedura nis me krijimin e qindra kompanive fantazëm në Tiranë, ku shtetas të ndryshëm arabë mbërrijnë këtu si investitorë të rëndësishëm. Çdo arab paguan deri në 5 mijë euro tek sekserët shqiptarë, të cilët në bashkëpunim me drejtues të Policisë së Shtetit, i sigurojnë edhe lejet e qëndrimit. Pas mbërritjes në Shqipëri, arabët përdorin mënyra të ndryshme për të shkuar drejt vendeve të Bashkimit Europian. Sërish kundrejt rryshfetit ata paguajnë deri në 3500 euro për të udhëtuar me skaf drejt Italisë. Nëpërmjet dëshmive dhe filmimimeve, janë zbuluar 3 zona në Tiranë, ku sekserë të ndryshëm ofrojnë trafikimin e arabëve drejt Italisë. Pjesa e parë e dokumentarit që do të shfaqet sonte në mbrëmje, do të ekspozojë sesa lehtë është të mbërrijnë arabët në Shqipëri, si krijohen kompanitë fantazëm dhe kush i garanton udhëtimin drejt Italisë.