Donjecku, Luhansku dhe disa rajone tjera ukrainase janë përballur sërish me sulme ruse, thanë të enjten zyrtarët ukrainas. Ushtria ukrainase, tha se forcat ukrainase u përballën me sulme të reja ruse, ku bombardimet dhe sulmet ajrore dëmtuan infrastrukturën e vendit. Operatori shtetëror bërthamor ukrainas, Enerhoatom, tha se centrali bërthamor i Zaporizhjas në Ukrainën jugore u shkëput përsëri nga rrjeti elektrik pasi granatimet dëmtuan linjat e mbetura të tensionit të lartë, duke e lënë atë vetëm me gjeneratorë me naftë. Shtabi i Përgjithshëm i Forcave të Armatosura të Ukrainës tha se luftime të ashpra po zhvillohen në lindje, ku trupat ruse po kryejnë operacione sulmuese në Bakmut, Avdijivka dhe Novopavlivka të rajonit lindor të Donjeckut. Rusët kryen sulme në 12 vendbanime në Donjeck dhe rajonin fqinj Luhansk. Forcat ukrainase i zmbrapsën sulmet, tha ushtria. Sipas tyre, në Luhansk forcat ruse po përdorin civilët si mburoja njerëzore.