Një zyrtar i lartë ukrainas ka nisur një vizitë në SHBA për të krijuar kontakte me administratën e ardhshme të presidentit të zgjedhur Donald Trump. Republikani fillon mandatin e tij të dytë në Shtëpinë e Bardhë në janar dhe ka premtuar t'i japë fund luftës së Rusisë në Ukrainë në "ditën e parë" të tij në detyrë. Shefi i kabinetit presidencial të Ukrainës, Andriy Yermak është tashmë në SHBA për të punuar për krijimin e një marrëdhënieje me ekipin e Trump, u tha gazetarëve në Bruksel ministri i Jashtëm Andriy Sybiha, sipas agjencisë së lajmeve Interfax Ukraine. “Ky kontakt në nivel të shefit të zyrës së presidentit është shumë i rëndësishëm për vendosjen e marrëdhënieve, ndër të tjera, me përfaqësuesit e administratës së re”, citohet të ketë thënë Sybiha. Trump deri më tani ka shmangur dhënien e detajeve në lidhje me planet e tij për të ndaluar pushtimin 33 mujor, por tre plane të paraqitura nga njerëz të afërt të tij, të gjitha parashikojnë që perspektiva e shumëdëshiruar e anëtarësimit të Kievit në NATO të hiqet nga tryeza e diskutimit. Këshilltarët e Trump kanë paraqitur gjithashtu propozime që do të shihnin lëshime të mëdha territoriale ndaj Moskës, e cila ka nën kontroll aktualisht një të gjashtën e Ukrainës.