Irani po përfiton nga armëpushimi me SHBA-në për të nxjerrë armët e tij, tha një zyrtar amerikan i njohur me çështjen për mediat. Regjimi ka shtuar përpjekjet e tij për të nxjerrë raketa dhe municione të tjera që i ka fshehur nën tokë ose që ndodhen nën rrënoja nga sulmet ajrore amerikane dhe izraelite, tha zyrtari që shtoi më tej se: SHBA-të besojnë se regjimi dëshiron të rindërtojë shpejt aftësitë e tij të dronëve dhe raketave, në mënyrë që të mund të nisë sulme në të gjithë Lindjen e Mesme nëse Presidenti Donald Trump vendos të rifillojë operacionet ushtarake, thanë burimet. Trump kishte planifikuar të takohej me ekipin e tij të sigurisë kombëtare të enjten për të shqyrtuar opsionet, duke përfshirë veprime të reja ushtarake, për hapjen e Ngushticës së Hormuzit dhe zhveshjen e Iranit nga çdo material bërthamor, sipas një zyrtari tjetër amerikan. Irani filloi të bllokojë Ngushticën e Hormuzit pasi SHBA-të dhe Izraeli filluan fushatën e bombardimeve më 28 shkurt, dhe ky veprim ka bërë që çmimet globale të naftës të rriten ndjeshëm. Sekretari i Mbrojtjes Pete Hegseth tha këtë muaj se SHBA-të kishin indikacione se Irani po përpiqej të rindërtonte aftësitë e tij ushtarake. “Ne e dimë se çfarë asetesh ushtarake po zhvendosni dhe ku po i zhvendosni ato”, tha ai në Pentagon.