Një ditë pas debateve në parlament për dosjet e ish- Sigurimit të Shtetit, Partia Socialiste depozitoi dy nisma ligjore në Kuvend. Kryetarja e Komisionit të Ligjeve, Klotilda Bushka e vlerësoi këtë hap si një adresim dhe reagim të menjëhershëm për të mbushur pengesat apo boshllëqet në legjislacionin ekzistues. Rastet flagrante dhe shqetësuese të pasqyruara në shkresën informuese të Autoritetit drejtuar Kuvendit të Shqipërisë, ku figura të rëndësishme të shtetit të pajisur me Çertifikatën e pastërtisë së figurës në fakt rezultojnë në dokumentat e krijuara të ish-Sigurimit të Shtetit, kërkojnë një adresim dhe reagim të menjëhershëm. Transparencë e plotë për këto raste duhet të kryhet dhe pengesat apo boshllëqet në legjislacionin ekzistues duhet të adresohen me qëllim zbardhjen e të vërtetës sipas vlerave demokratike të drejtësisë si përgjegjësi për brezat e ardhshëm por mbi të gjitha detyrim për ata që vuajtën nën regjimin e kaluar.