Zyrtarët amerikanë të sigurisë kombëtare thonë se Irani është përgjegjës për dërgimin e email-eve kërcënuese votuesve demokratë. Email-et duket se vinin nga një grup pro Trump i krahut të djathtë dhe duhej të nxisnin zemërim – tha drejtori i inteligjencës kombëtare, John Ratcliffe. Ai shtoi se zyrtarët amerikanë kanë zbuluar se Irani dhe Rusia kanë mundur po ashtu të shtijnë në dorë disa informacione mbi regjistrimin e votuesve. Njoftimi vjen vetëm 13 ditë para zgjedhjeve presidenciale në SHBA. Një raportim i tillë i inteligjencës, kaq pak kohë para zgjedhjeve, konsiderohet si një testament për shqetësimet e qeverisë në lidhje me ndërhyrjen në zgjedhje dhe fushatat dezinformuese nga faktorë të jashtëm. Ratcliffe tha se email-et e nisura nga Irani, e që pretendohej se ishin dërguar nga grupi i ekstremit të djathtë Proud Boys, kishin si qëllim të frikësonin votuesit, të ndiznin zemërimin dhe të dëmtonin presidentin Donald Trump. Ndërsa të dhënat e votuesve, sipas tij, mund të përdoren në përpjekje për të komunikuar informacione false të zgjedhësve të regjistruar që shpresojnë se do të shkaktojnë kaos e konfuzion dhe të cënojnë besimin tek demokracia amerikane. Zyrtarët sipas Ratcliffe nuk kanë parë të njëjtat veprime nga rusia por janë të ndërgjegjshëm se ata kanë informacione për votuesit.