Zvicra ka ngrirë asete ruse në vlerë 5.8 miliardë franga zvicerane, njoftoi të martën Qeveria e vendit. Kjo përbën një rënie të madhe e cila mund të rrisë presionin ndërkombëtar ndaj vendit neutral, për të bërë më shumë për sanksionimin e Moskës, për shkak të pushtimit të Ukrainës. Kjo shifër, e cila vlen për asetet e ngrira në fund të vitit 2023, shënon rënie nga 7.5 miliardë franga zvicerane të asteteve të ngrira në fund të vitit 2022. Arsyeja kryesore për këtë ishte një rënie e aksioneve dhe aseteve financiare në vlerën e tregut, të cilat janë bllokuar, tha Sekretariati Shtetëror për Marrëdhënie Ekonomike. Kjo rënie pritet të nxisë kritika nga ndërkombëtarët se Zvicra nuk po bën sa duhet për ndëshkimin e Moskës për shkak të pushtimit të Ukrainës. Megjithëse Zvicra i ka intensifikuar dukshëm përpjekjet për të luftuar kompanitë dhe individët që përdorinvendin për të evituar sanksionet, vendet e tjera duan që ajo të bëjë më shumë. Zvicra deri më tani i ka miratuar të gjitha masat evropiane, qëllimi i të cilave është t’i pamundësojnë Rusisë marrjen e mallrave dhe teknologjisë për ushtrinë e vet, por Berna ka zgjedhur edhe rrugën e vet. Dhoma e ulët e Parlamentit të Zvicrës nuk pranoi javën e kaluar t’i bashkohej një taskë-force ndërkombëtare për vendosjen e sanksioneve ekonomike kundër Rusisë, pjesë e së cilës janë Shtetet e Bashkuara, Australia, Kanadaja, Komisioni Evropian, Franca, Gjermania, Italia, Japonia dhe Britania e Madhe.