Me flamingot në sfond dhe sloganin “Nga protesta te prova. Nga rruga te procesi”, qeveria publikoi platformën ku do të mblidhen shqetësimet e qytetarëve dhe ku do të bëhet transparencë për vendimmarrjet qeveriare. Dosja e parë e publikuar është ajo e projekteve në Sazan dhe Zvërnec, ndërkohë sipas kryeministrit Edi Rama në ditët e ardhshme pritet të bëhen publike dokumentet që lidhen me kompaninë “Kayo” dhe investimin në Milot-Balldren. “E kemi quajtur “Pasqyra e Flamingos” ose “Flamingo Mirror”, është në të dy gjuhët, në shqip dhe në anglisht. Patjetër që nuk mund të mos niste me dosjen më tërheqëse të Republikës së Shqipërisë sot që flasim, me dosjen e Sazan Zvërnecit dhe është një burim, i cili do t'i shërbejë të gjithëve. Shumë shpejt do të publikojmë dosjen qeveritare të Kajos, një tjetër emër që tanimë përflitet në rrugët e kanaleve sociale dhe në hapësirat e medias televizive. Po ashtu Milot - Balldreni ka qenë një tjetër temë e cila është diskutuar mbi, sipas nesh, trillime, gjysmë të vërteta, informacione të paverifikuara dhe pastaj sigurisht faktet janë vendosur në të gjitha këto raste nën presionin e madh që vjen nga një botë, e cila varet gjithmonë e më shumë nga çfarë thuhet dhe jo nga si dhe sa verifikohet” Rama shtoi se komponenti i dytë i “Flamingo Mirror” do të mbledhë pyetjet e qytetarëve, për t’u kthyer përgjigje zyrtare.