Debati mbi projektin turistik në Zvërnec ka rikthyer përplasjen e njohur mes zhvillimit ekonomik dhe shqetësimeve mjedisore. Nga njëra anë qëndrojnë investitorët dhe mbështetësit e projektit, të cilët argumentojnë se zona ka nevojë për infrastrukturë moderne turistike. Nga ana tjetër janë grupet e aktivistëve dhe banorëve që shprehin frikën se zhvillimi mund të kufizojë aksesin publik në bregdet dhe të ndryshojë karakterin natyror të zonës. Zvërneci nuk është as rasti i parë dhe nuk ka për të qenë as i fundit në debatin mes mbrojtjes së mjedisit dhe zhvillimit. Nga Mali i Zi vjen rasti më i freskët. Një nga rastet më të njohura lidhet me zonën e "Shën Stefanit" pranë Budvës, ku gjatë viteve janë zhvilluar protesta kundër investimeve turistike, privatizimit të hapësirave dhe ndryshimeve urbanistike. Megjithatë, pavarësisht kundërshtimeve fillestare, Shën Stefani dhe Riviera e Budvës konsiderohen sot ndër destinacionet më të njohura turistike në Ballkan, duke tërhequr vizitorë nga e gjithë bota dhe duke gjeneruar të ardhura të konsiderueshme për ekonominë lokale falë turizmit elitar. Përkrahësit e zhvillimit në Zvërnec e përdorin shpesh këtë shembull për të argumentuar se kundërshtimet ndaj investimeve të mëdha janë një fenomen i zakonshëm, por që në disa raste rezultatet afatgjata kanë sjellë përfitime ekonomike dhe turistike. Një nga debatet më të forta lidhet me përfaqësimin e interesit publik.