Pas protestës së dytë në pak më shumë se një muaj, nga ana e Njësisë Speciale intervenuese të Kosovës, e cila kërkon paga më të larta, ka reaguar edhe Ministri i Brendshëm Xhelal Zveçla, nëpërmjet një postimi në Facebook. Zveçla u shpreh se sakrifica nuk mund të jetë pikënisje për shpërblim më të lartë, duke theksuar se jeta është e paçmueshme. Ai solli në vëmendje edhe investimet e shumta të bëra nga qeveria Kurti jo vetëm për rritje të pagave, por edhe për modernizimin e Policisë së Shtetit. “Ritheksoj se për Policinë e Kosovës nga marrja e mandatit tonë deri sot e kemi rritur buxhetin për 30%, ndërkaq në investime kapitale rritja është prej 300%. Buxheti për pajisje operacionale ka qenë më pak se gjysmë milioni, ndërkaq sot është mbi 9 milionë euro apo 21-fish më shumë. Me marrjen e mandatit nga ne Policia e Kosovës, Njësitë Speciale kanë pasur dhe vazhdojnë të kenë mbështetjen më të madhe si në aspektin financiar ashtu edhe me ngritjen në strukture”, shkroi ndër të tjera Zveçla. Ministri i Brendshëm i Kosovës aludoi edhe për një përdorim politik të protestës, teksa shtoi se kushdo që e përdor atë për interesa personale apo grupore, është i predispozuar të dështojë.