Policia ka ushtruar kontrolle përgjatë bregut të liqenit të Pogradecit, me qëllim lirimin e hapësirave publike, për pushuesit. Si rrjedhojë e kontrollit, është proceduar penalisht 1 administrator subjekti, shtetasi H. M., 66 vjeç pasi kishte zënë hapësirën publike me shezlongë dhe çadra të vendosura pa lejen përkatëse. Si rezultat i kontrolleve dhe i verifikimeve të kryera në bashkëpunim me Policinë Bashkiake të Pogradecit, në lagjen nr. 1, përgjatë bregut të liqenit, u lirua hapësira publike, me heqjen dhe sekuestrimin e 21 shezlongëve dhe çadrave, që ishin vendosur pa lejen përkatëse. Policia e Shtetit është e angazhuar maksimalisht për të parandaluar dhe për të goditur paligjshmëritë, si dhe për të krijuar një ambient sa më të sigurtë për pushuesit, vizitorët dhe turistët, gjatë gjithë sezonit turistik.