"Zoti e ruajtë Carin!" ishte një nga urimet e para publike për ditëlindjen e Presidentit Vladimir Putin, i cili mbush 72 vjeç të hënën dhe që ka qenë lideri kryesor i Rusisë për gati çerek shekulli. Urimi i parë erdhi nga ideologu ultra-nacionalist rus Alexander Dugin në kanalin e tij të mesazheve në Telegram disa minuta pas mesnate. Dugin, 62 vjeç, ka mbrojtur prej kohësh bashkimin e territoreve rusishtfolëse dhe territoreve të tjera në një perandori të re të madhe ruse, e cila, sipas tij duhet të përfshijë edhe Ukrainën. Vajza e Dugin u vra në një shpërthim në makinën me të cilën po udhëtonte, në vitin 2022. Putin, i cili urdhëroi trupat e tij të pushtonin Ukrainën në 2022, siguroi një fitore rekord në zgjedhjet e marsit. Mandati i tij i ri gjashtë-vjeçar, nëse përfundon, do ta bënte atë udhëheqësin më jetëgjatë të Rusisë në më shumë se 200 vjet, kur carët dhe perandoresha sundonin vendin. Fitorja çimentoi kontrollin tashmë të ngushtë të Putinit në pushtet dhe, tregoi, sipas tij, se Moska kishte pasur të drejtë që iu kundërvu perëndimit dhe dërgoi trupat e saj në Ukrainë. Perëndimi e sheh Putinin si një autokrat dhe madje edhe një vrasës. Presidenti ukrainas Volodymyr Zelenski e quajti të paligjshme votimin e marsit që zgjati sundimin e ish-spiunit të KGB-së. Putin e portretizon luftën në Ukrainë si pjesë e një beteje shekullore me një Perëndim, për të cilin ai thotë se poshtëroi Rusinë pas Luftës së Ftohtë duke shkelur sferën e ndikimit të Moskës. Kievi dhe aleatët e tij perëndimorë e quajnë luftën një rrëmbim imperialist tokash. "Sot, miq, është ditëlindja e udhëheqësit tonë kombëtar", shkroi Ramzan Kadyrov, lideri i Republikës Çeçene të Rusisë, i cili e quan veten "ushtar" i Putinit, në një mesazh urimi në Telegram mesnatën e së hënës. "Kjo është një ditë e rëndësishme për të gjithë Atdheun tonë."