Policia e Tiranës njoftoi arrestimin e katër personave dhe nisjen e hetimeve ndaj pronarit të kompanisë që ka ndërtuar pallatin e përfshirë nga flakët pasditen e së martës në zonën pranë QSUT. I arrestuar është një 54 vjeçar, administrator i kompleksit të pallateve, një 54 vjeçare, menaxhere e marketit të vendosur në katin përdhes të godinës, ku dyshohet se kanë nisur flakët, një 66 vjeçar, inxhinieri drejtues i punimeve për ndërtimin e kompleksit dhe një 46 vjeçar, që është administratori i subjektit që ka kryer punimet e fasadës. Gjithashtu, policia thotë se nisi hetimi penal për pronarin e kompanisë ndërtuese ‘Arlis’, 48 vjeçarin Armand Lilo, ndaj një 41 vjeçari të kontraktuar për ndërtimin e kompleksit dhe ndaj dy punonjëseve të marketit ku dyshohet se kanë nisur flakët. Policia thotë se flakët dyshohet të kenë nisur në zonën e pasme të marketit, ku menaxherja dhe punonjëset e tij kishin lënë disa mbeturina. Ndaj këtyre personave rëndojnë akuzat e shkeljes së rregullave të sigurisë në punë dhe shkatërrimi i pronës me zjarr nga pakujdesia