Një zjarr i përmasave të konsiderueshme ka rënë mesditën e së dielës në varrezat e fshatit Babicë të Vlorës. Flakët, të favorizuara nga era e fortë, janë përhapur me shpejtësi duke dalë jashtë zonës së varrezave dhe duke rrezikuar edhe një banesë që ndodhet pranë vatrës së zjarrit. Forcat zjarrfikëse kanë ndërhyrë menjëherë në terren dhe kanë arritur të shmangin përhapjen e flakëve drejt banesës, ndërsa vijojnë përpjekjet për izolimin dhe shuarjen e plotë të zjarrit. Si pasojë e përhapjes së flakëve, janë djegur edhe dhjetëra ullinj shekullorë, duke shkaktuar dëme të konsiderueshme në zonën përreth. Ndërkohë, zjarri vijon të jetë aktiv në disa vatra, ndërsa forcat zjarrfikëse po punojnë për neutralizimin e tyre dhe parandalimin e përhapjes së mëtejshme. Ende nuk dihen shkaqet e rënies së zjarrit, ndërsa pritet që pas shuarjes së plotë të flakëve të nisë edhe dokumentimi i dëmeve të shkaktuara.