Gjykata penale e Tiranë ka liruar nga qelia 4 të arrestuarit për zjarrin e rënë pak ditë më parë te pallati 12 katësh pranë QSUT. togat e zeza caktuan masat e sigurimit detyrim paraqitje për menaxheren e marketit, administratorin e pallatit, inxhinierin dhe administratorin e firmës së fasadës. 4 shtetasit u arrestuan pas ngjarjes së rëndë, ku si pasojë e flakëve që fillimisht përfshinë fasadën e pallatit, u dogjën në brendësi disa prej apartamenteve. Sakaq, hetimet për rastin vijojnë ende, ndërsa sipas burimeve hetimore, zjarri masiv që përfshiu pallatin 12-katësh pranë QSUT-së dyshohet të jetë shkaktuar nga pakujdesia e disa të miturve. kamerat e sigurisë kanë filmuar pesë të mitur në pjesën e pasme të një marketi, aty ku nisën flakët. Dy prej tyre shihen teksa largohen duke mbajtur një objekt, që dyshohet të ketë qenë letër, të cilën e hedhin mbi disa kuti kartoni dhe largohen menjëherë. Pak minuta më vonë në vendin ku u hodh letra shfaqet tym, i cili përhapet me shpejtësi në flakë, duke përfshirë fasadën e pallatit dhe duke shkaktuar dëme të mëdha materiale.