Policia e Fierit ka vënë në pranga një 20-vjeçar për zjarrvënie të qëllimshme. I riu i vuri flakën një sipërfaqe toke në pronësi të babait të tij në fshatin Drizë, dyshohet për të djegur disa barishte dhe më pas zjarri doli jashtë kontrollit duke u përhapur në territorin e disa fshatrave. Si pasojë e zjarrit, u evakuuan 12 familje, banesat e të cilave u rrezikuan nga flakët. Në këtë emergjencë ndërhynë forcat e Policisë, shërbimet zjarrfikëse, grupet e Forcës Kombëtare të Sigurisë Njësia Fier, si dhe helikopterë nga Forcat e Armatosura. Vatra e zjarrit nisi pranë zonës së quajtur ‘Azotiku’ e më pas u përhap në zonën e Qafës së Koshovicës, duke përfshirë sipërfaqe të pyllëzuara në afërsi të fshatrave Peshtan i Madh, Peshtan i Vogël, Drizë Myrtezaj dhe Plyg. Zjarri shkaktoi dëme të konsiderueshme në bazën materiale të stacionit kryesor të furnizimit me ujë të qytetit si edhe përfshiu mbi 100 hektarë sipërfaqe me shkurre dhe ullishte.