Liderët botërorë kanë bërë thirrje urgjente për shtensionimin e situatës në lindjen e mesme, ku Izraeli dhe Irani po këmbejnë prej tre ditësh tashmë raketa e bomba. Sulmet e izraelit ndaj objekteve bërthamore të iranit vendosin një “precedent të rrezikshëm”, tha ministri i jashtëm i Kinës në një reagim. Kryeministri i Izraelit, Benjamin Netanyahu, i hodhi poshtë ndërkohë këto thirrje, duke thënë se sulmet e deritanishme të Izraelit janë “asgjë krahasuar me atë që do të vijë në ditët në vijim”. Presidenti amerikan Donald Trump tha ndërkohë se konflikti mund të përfundonte lehtësisht, duke paralajmëruar Teheranin të mos godiste asnjë objektiv amerikan. "Nëse sulmohemi në çfarëdo mënyre apo forme nga Irani, forca dhe fuqia e plotë e ushtrisë së SHBA-së do të bjerë mbi ju në nivele të papara më parë", tha Trump në një mesazh në Truth Social. "Megjithatë, ne mund të arrijmë lehtësisht një marrëveshje mes Iranit dhe Izraelit dhe t'i japim fund këtij konflikti të përgjakshëm." Trump nuk dha detaje për ndonjë marrëveshje të mundshme. Izraeli, i vetmi shtet me armë bërthamore në Lindjen e Mesme, ndonëse i padeklaruar zyrtarisht, tha se e nisi sulmin për të parandaluar Iranin nga zhvillimi i një arme bërthamore. Irani dhe Izraeli janë armiq rajonalë për dekada me radhë. Irani gjithmonë ka pohuar se programi i tij bërthamor është paqësor, dhe SHBA së bashku me të tjerë kanë vlerësuar se ai nuk ka synuar zhvillimin e armës që nga viti 2003. Megjithatë, Irani ka pasuruar sasi gjithnjë e më të mëdha uraniumi në nivele afër atyre për armë dhe besohet se mund të zhvillojë disa armë brenda muajsh nëse dëshiron ta bëjë. Agjencia Ndërkombëtare për Energjinë Atomike e OKB-së e dënoi Iranin javën e kaluar për mospërmbushjen e detyrimeve të tij.