Në të gjithë territorin e vendit, deri në orën 14:00 janë regjistruar 6 vatra zjarri, nga të cilat 4 mbeten aktive dhe 2 janë nën monitorim. Në terren janë angazhuar 126 forca operacionale, ndërsa Forcat e Armatosura mbështesin operacionet me 90 efektivë dhe dy helikopterë të Forcës Ajrore. Në Dajt të Tiranës vijon operacioni për kontrollin e flakëve, ku janë angazhuar 50 efektivë të Forcave të Armatosura, 15 forca zjarrfikëse dhe 5 forca të Agjencisë së Zonave të Mbrojtura. Sipas njoftimit të Ministrisë së Mbrojtjes, nuk ka rrezik për zonat e banuara. Në Priskë, pas riaktivizimit të vatrës, forcat zjarrfikëse vijojnë ndërhyrjen, ndërsa situata nuk paraqet rrezik për banesat. Në Lufaj të Mirditës, zjarri mbetet aktiv me intensitet të ulët. Në terren ndodhen 8 forca të Shërbimit Pyjor dhe 4 zjarrfikës, të mbështetur nga një automjet zjarrfikës.