Katër persona humbën jetën në Ukrainë pasi zjarri përfshiu repartin e terapisë intensive në një spital të sëmundjeve infektive që po trajton pacientë me koronavirus. Ky, ishte më i fundit mes një serie zjarresh vdekjeprurës në Ukrainë, që nuk janë të pazakontë në ish republikën sovjetike për shkak të respektimit të mangët të rregulloreve të sigurisë dhe infrastrukturës së vjetëruar. Zjarri shpërtheu pak para mesnatës, të mërkurën, në katin e parë të ndërtesës pesë katëshe, në qytetin jugperëndimor Zaporizhzhya. Zjarri i mori jetën katër personave, mes të cilëve një punonjës shëndetësor – tha policia rajonale. Tre nga viktimat ishin diagnostikuar me koronavirus dhe ishin në ventilator, sipas guvernatorit lokal. Dy pacientë kanë pësuar djegie dhe helmim nga tymi, ndërsa gjashtë të tjerë janë shpëtuar të palënduar. Shkaku i zjarrit nuk është bërë menjëherë i ditur por policia thotë se ka nisur një hetim për shkeljen e masave të sigurisë. Presidenti Volodimir Zelenski, shprehu keqardhjen e tij dhe ngushëlloi familjet e viktimave ndërsa ministri i shëndetësisë vizitoi vendin e ngjarjes. Në janar, 16 persona humbën jetën pas zjarrit në një shtëpi kujdesi në qytetin lindor të ukrainës, Kharkiv. Në dhjetor 2019 zjarri i mori jetën 16 personave dhe lëndoi 30 të tjerë në një kolegj në qytetin e Odesës. 17 persona ndërkohë mbetën të vdekur në maj 2016, kur një shtëpi të moshuarish jashtë kievit u përfshi nga flakët.