Një zjarr masiv në një depo nafte që shpërtheu pranë vendpushimit rus të Soçit në Detin e Zi është shkaktuar nga një sulm me dronë ukrainas. Aeroporti i afërt i Soçit, si pasojë, ka pezulluar fluturimet. Guvernatori i Rajonit Krasnodar Veniamin Kondratyev tha në Telegram se mbetjet e dronit të rrëzuar goditën një rezervuar karburanti dhe 127 zjarrfikës po luftojnë tani me flakët. Autoritetet ruse thanë se sulmi me dron në rafinerinë e Soçit ishte një nga disa sulmet e nisura nga Ukraina gjatë fundjavës, që kishin në shënjestër qytetet jugore ruse të Ryazanit, Penzës dhe Voronezhit. Guvernatori i Voronezhit tha se katër persona u plagosën në një sulm me dron. Ministria e mbrojtjes në Rusi tha se mbrojtja e saj ajrore kishte rrëzuar 93 dronë ukrainas gjatë natës, 60 prej të cilëve mbi rajonin e Detit të Zi. Forca ajrore e Ukrainës tha në anën tjetër se Rusia lëshoi mbi vend 83 dronë dhe shtatë raketa gjatë natës, 61 prej të cilëve u rrëzuan. Ajo shtoi se 16 dronë dhe gjashtë raketa goditën objektivat në tetë vende. Kjo vjen pas një jave veçanërisht vdekjeprurëse për civilët në Ukrainë, përfshirë një sulm ndaj Kievit të enjten që vrau të paktën 31 persona.