Një vatër masive zjarri që përfshiu zonën e Margëlliçit është shuar pas më shumë se katër orësh, pas ndërhyrjes nga ajri me një avion zjarrfikës Air Tractor. Flakët rrezikuan të përhapeshin drejt banesave dhe puseve të naftës, ndërsa zjarri përfshiu edhe varrezat e fshatit. Shërbimet zjarrfikëse të Patosit ndërhynë menjëherë në terren, duke arritur të frenojnë përparimin e flakëve dhe të mbajnë nën kontroll situatën, deri në mbërritjen e avionit zjarrfikës. Pas ndërhyrjes nga ajri, vatra u neutralizua dhe rreziku për banesat u shmang. Nga bilanci paraprak raportohet se janë djegur disa hektarë ullishte dhe sipërfaqe pyjore. Ndërkohë, ende nuk dihen shkaqet e rënies së zjarrit. Autoritetet pritet të vijojnë hetimet për të përcaktuar nëse bëhet fjalë për një zjarr aksidental apo të qëllimshëm.