Një zjarr masiv përfshiu fshatin Riban në Mallakastër, duke djegur sipërfaqe të mëdha toke dhe duke shkaktuar dëme të konsiderueshme në bimësi. Policia e Fierit, në bashkëpunim me zjarrfikësit, Forcat Kombëtare të Sigurisë, strukturat e emergjencave civile, si dhe me mbështetjen nga ajri të një helikopteri të Ministrisë së Mbrojtjes dhe një avioni Canadair, u angazhua që në orët e para të mëngjesit së të martës për vënien nën kontroll të flakëve. Për shkak të përhapjes së zjarrit drejt zonave të banuara, policia evakuoi 15 familje, si dhe bagëtitë dhe kafshët e tyre shtëpiake, për të garantuar sigurinë e banorëve. Operacioni për izolimin dhe shuarjen e vatrave të zjarrit vijoi gjatë gjithë ditës, ndërsa forcat në terren ofruan ndihmë edhe për banorët e zonës së prekur. Ndërkohë, grupi hetimor, nën drejtimin e Prokurorisë, nisi hetimet për të përcaktuar shkakun e zjarrit, dokumentuar rrethanat e ngjarjes dhe identifikuar autorin, nëse zjarri rezulton të jetë shkaktuar nga veprime të kundërligjshme.