Një zjarr i fuqishëm ka përfshirë gjatë natës malin e Pindit pranë Konicës në Greqi, duke shkaktuar panik te banorët e zonës. Flakët janë përhapur me shpejtësi dhe sipas dëshmive të banorëve janë afruar deri në rreth 10 metra nga banesat e qytetit të Konicës. Situata ka detyruar autoritetet që gjatë natës të evakuojnë banorët nga shtëpitë në pjesën e sipërme të qytetit, për shkak të rrezikut të përhapjes së flakëve drejt kësaj zone të banuar. Puna e zjarrfikësve ka vijuar deri në orët e para të mëngjesit dhe për përballimin e situatës është ndërhyrë edhe nga ajri me dy helikopterë dhe një avion. Afërsia e flakëve me banesat e ka bërë situatën veçanërisht shqetësuese, ndërsa ekipet në terren po punojnë për krijimin e një perimetri sigurie dhe frenimin e përhapjes së zjarrit. Operacioni për shuarjen e plotë të flakëve ende vijon, ndërkohë që autoritetet greke monitorojnë situatën dhe mbajnë në gatishmëri emergjencat për çdo përkeqësim të mundshëm.