Kievi dhe Odesa në Ukrainë janë vënë nën sulmet më masive ruse që nga fillimi i pushtimit të Ukrainës. Moska po sulmon me qindra dronë dhe raketa. Sipas mediave lokale, në Odesa u goditën ndërtesa e qendrës së rekrutimit të ushtrisë ukrainase dhe ndërtesa banimi. Një ditë më parë, të paktën dy persona u vranë në një sulm masiv në Kiev të Ukrainës. Disa lagje të qytetit u goditën. Kryebashkiaku Vitali Klitschko raportoi se një stacion ambulancash u shkatërrua. Kohët e fundit, janë regjistruar një seri sulmesh masive të kombinuara ruse. Ajo që ndodhi natën e 4 korrikut në Kiev, për shembull, quhet edhe si "nata e ferrit" nga mediat ukrainase. Ushtria ruse përdori më shumë se 500 dronë dhe raketa Kinzhal dhe Iskander. Pas kësaj, edhe Presidenti amerikan Donald Trump, i cili më parë e kishte paraqitur veten si ndërmjetës në konfliktin mes Rusisë dhe Ukrainës, tha se ishte i zhgënjyer me Rusinë. Ai gjithashtu e ashpërsoi retorikën e tij ndaj Kremlinit. "Putin po bën shumë budallallëqe", tha Trump, duke shtuar se presidenti rus është "gjithmonë shumë i sjellshëm", por në fund "kjo rezulton të jetë e parëndësishme". Menjëherë pas këtyre deklaratave, SHBA rifilloi dërgesat e armëve në Ukrainë, mes të cilave predha artilerie dhe obusë. SHBA ka vendosur madje të dërgojë përsëri edhe sisteme Patriot.