Ish-presidenti francez, Nicolas Sarkozy, doli nga shtëpia e tij në Paris të martën për t'iu drejtuar burgut, duke ecur i kapur për dore me gruan e tij, Carla Bruni, i shoqëruar nga brohorimat e një turme mbështetësish që ishin mbledhur aty. Sarkozy hipi në makinë për t'iu drejtuar burgut Santé të kryeqytetit francez, ku do të fillojë një dënim me pesë vjet, në një kthesë tronditëse për një burrë që ishte president i Francës mes viteve 2007 dhe 2012. Një gjykatë vendosi ta burgosë ish-udhëheqësin konservator pasi e gjeti fajtor për komplot për të mbledhur fonde për fushatën nga Libia. Sarkozy do të bëhet ish-udhëheqësi i parë francez që burgoset që nga bashkëpunëtori nazist, Marshall Philippe Petain, pas Luftës së Dytë Botërore. Të martën, ai shkroi në një mesazh të gjatë në X: "Dua t'i them popullit francez, me forcën time të palëkundur, se nuk është një ish-president i Republikës që po burgoset këtë mëngjes, është një njeri i pafajshëm". Dënimi i Sarkozisë i jep fund viteve të tëra betejash ligjore mbi akuzat se fushata e tij e vitit 2007 mori miliona dollarë nga udhëheqësi libian Muammar Gaddafi, i cili më vonë u rrëzua dhe u vra gjatë kryengritjeve të Pranverës Arabe. Ndërsa Sarkozi u shpall fajtor për komplot me ndihmës të ngushtë për të orkestruar skemën, ai u lirua nga akuzat për marrjen ose përdorimin personal të fondeve. Ai vazhdimisht ka mohuar çdo shkelje dhe e ka quajtur çështjen të motivuar politikisht.