Një operacion kërkim-shpëtimi është nisur në lindjen e largët të Rusisë pas zhdukjes së një helikopteri me 22 persona në bord, shumica prej të cilëve turistë. Helikopteri Mi-8T u ngrit nga një bazë pranë vullkanit Vachkazhets në gadishullin Kamchatka, tha të shtunën ministria e emergjencave. Kjo zonë e gadishullit është një destinacion popullor turistik, i famshëm për peizazhet e pasura dhe vullkanet aktive. Zyrtarët thonë se helikopteri u zhduk nga radarët pak pas nisjes, duke shtuar se mjegulla e dendur po pengon përpjekjet e shpëtimtarëve. Helikopteri, në pronësi të Vityaz-Aero, po kryente një udhëtim në vullkan. I projektuar gjatë epokës sovjetike, helikopteri Mi-8 mbetet i popullarizuar dhe i përdorur gjerësisht në Rusi. Ai u zhduk nga radarët dhe anëtarët e ekuipazhit nuk arritën të kontaktojnë tha guvernatori i Kamchatka. Një burim i ministrisë së emergjencave i tha agjencisë shtetërore të lajmeve Tass se ekuipazhi nuk raportoi ndonjë vështirësi përpara zhdukjes. Vladimir Solodov tha se në bord kishte 19 pasagjerë dhe tre anëtarë të ekuipazhit. Kërkimet ajrore kanë vazhduar edhe gjatë natës, por ka pasur dukshmëri të dobët. Të tjerë i janë bashkuar kërkimit në këmbë, përgjatë luginës së lumit Bystraya, përgjatë së cilës duhej të lëvizte helikopteri. Gadishulli malor Kamchatka - më shumë se 6,000 km në lindje të Moskës - është i popullarizuar në mesin e turistëve.