Partia italiane Forza Italia, e cila drejtohej nga ish-kryeministri i ndjerë Silvio Berlusconi, do të drejtohet përkohësisht nga Antonio Tajani, ministri aktual i Punëve të Jashtme. Këtë të shtunë u mblodh edhe këshilli kombëtar i partisë Forza Italia, që votoi njëzëri Tajanin si drejtues të forcën politike deri në mbledhjen e një kongresi të ri. Gjatë mbledhjes, Tajani sugjeroi që të pranishmit të zëvendësojnë minutën tradicionale të heshtjes me një minutë duartrokitje në kujtim të Silvio Berlusconit. E pikërisht duartrokitjet dhe thirrjet “Silvio! Silvio!” zgjatën për disa minuta. Gjithashtu u propozua po nga Tajani, që kreu I partisë, tani e tutje të quhet ‘sekretar kombëtar’ dhe titulli president të mbetet përgjithmonë i Silvio Berlusconit. Ky i fundit u nda nga jeta më 12 qershor të këtij viti, në moshën 86-vjeçare. Ai vuante nga një leucemi në rrugët e frymëmarrjes dhe ishte shtruar disa herë në spital gjatë muajve të fundit. Berlusconi ishte një nga personazhet më të njohur italianë, pasi përveçse politikan karriere, njihej si biznesmen ën fushën e medias dhe jo vetëm, por edhe si ish-president i klubit të Milanit, në vitet më të lavdishme.