Prokurorët gjeorgjianë kanë thirrur presidenten e vendit, Salome Zurabishvili, për të dëshmuar, pasi nisën një hetim ndaj dyshimeve mbi manipulime në zgjedhjet e 26 tetorit, të cilat i fitoi partia në pushtet, Ëndrra Gjeorgjiane. Presidentja Zurabishvili dhe opozita ngulin këmbë se ka pasur shkelje të mëdha në këto zgjedhje. Një ditë më parë, presidenti amerikan, Joe Biden, shprehu shqetësimin e tij të thellë për regresin demokratik të Gjeorgjisë dhe bëri thirrje për hetim transparent ndaj dyshimeve për vjedhje votash. Partia gjithnjë e më autoritare, Ëndrra Gjeorgjiane, shpalli fitoren me pothuajse 54 për qind të votave, duke nxitur mijëra njerëz të protestojnë kundër rezultatit zgjedhor, i cili, sipas tyre, u manipulua nga partia në pushtet përmes taktikave të stilit rus. Vëzhguesit ndërkombëtarë të zgjedhjeve deklaruan se zgjedhjet u karakterizuan nga "një fushë e pabarabartë, presion dhe tension". Ata gjithashtu njoftuan për raste të regjistruara të blerjes së votave, votimit të dyfishtë, dhunës fizike dhe kërcënimit. Prokuroria e Përgjithshme deklaroi se hetimi ka nisur, pasi Zurabishvili tha se zgjedhjet u shoqëruan me shkelje dhe refuzoi të pranonte rezultatin e tyre.