Komisioni Qendror i Zgjedhjeve raportoi se pjesëmarrja në votimet e pjesshme të së dielës ishte pak më shumë se 18 për qind, ose rreth 20 për qind poshtë pjesëmarrjes në zgjedhjet e rregullta vendore të vitit 2023. Nga pesë bashkitë ku u mbajtën këto zgjedhje, vetëm në Bashkinë e Matit pjesëmarrja ishte pothuajse e njëjtë me pjesëmarrjen në rang vendi në lokalet e dy viteve më parë. Në katër bashkitë e tjera, qendrat e votimit panë më pak votues, me rekordin e vendosur nga Bashkia e Vlorës me vetëm 12 për qind pjesëmarrje, 6 për qind më pak edhe se zgjedhjet e vitit 2019, të bojkotuara në atë kohë nga opozita. Të dhënat paraprake të KQZ tregojnë se zgjedhjet u bojkotuan masivisht nga të rinjtë, ndërsa vendimtarë me votën e tyre kanë qenë pensionistët dhe personat e moshës 55 deri në 65 vjecc. Tek më të rinjtë, kontributi për votën është dukmë i ulët për shkak të emigracionit, por edhe për shkak të interesit të ulët të tyre për të dalë në votime. Interesi i të rinjve për të votuar ka qenë sidomos i ulët në Vlorë, ku më pak se 10 për qind e grupmoshës deri në 35 vjeç që kanë të drejtë vote, i janë drejtuar qendrave të votimit.