Drejtuesi politik i qarkut të Korçës, Niko Peleshi u ndal në Ersekë, nga ku shpjegoi se për shkak të uljes së popullsisë mund të ketë më pak mandate, krahasuar me zgjedhjet e vitit 2021. Megjithatë, diaspora shihet si një potencial i madh. Vota e tyre do të llogaritet atje ku kanë pasur vendbanimin e fundit në Shqipëri, dhe një pjesë e mirë e emigrantëve shqiptarë në Greqi, i përkasin qarkut të Korçës. “Ka mundësi që për shkak të rritjes së numrit të votuesve të popullsisë në Tiranë, qarku i Korçës mund të ketë një mandat më pak, ndonëse Korça si bashki dhe qark ishte zona me uljen më të vogël të popullsisë. Objektivi ynë vazhdon të jetë i njëjti, ne do të marrim minimalisht 6 deputetë, me një diferencë prej të paktën 2 deputetësh nga PD, por duke patur parasysh dhe potencialin e ri që i ofrohet politikës me kodin e ri të ndryshuar zgjedhor, që është vota e Diasporës, objektivat dhe mund të rriten sepse ka një potencial të madh në Diasporë. Pra ne mund të kemi votues në Diasporë po aq sa edhe në Shqipëri. Një nga pikat e takimit në çdo asamble të Ps në bashkitë e qarkut është organizimi për votën e Diasporës.”